都市人生活壓力緊張，往往很容易成為「成癮者」。不同研究均指出成癮問題對個人、家庭、工作和社會帶來負面影響，當中包括負債問題。以下便是一宗活生生的例子，險釀成一宗倫常悲劇。

事主姓李，男性，年屆四十。「我都唔想搞成咁，但我唔知點做。之前份工好大壓力，成日都會 shopping，覺得買嘢先至可以紓緩到壓力。放工會喺商場週圍行，點都會買啲嘢先返屋企，無嘢買我會覺得好空虛。買嗰一刻好開心，但買完嘢返到屋企我唔會理嗰堆戰利品，所以屋企積咗好多我買咗無用嘅嘢。每次shopping 我都係用信用卡，貪佢可以下個月先還錢。

直到疫情嚟到，公司生意唔好，有日突然畀公司炒咗，想搵新工又搵唔到，搵咗好耐都無回音。失業嗰段日子日日坐喺屋企無嘢做又無收入，於是把心一橫，入馬場搏一鋪！初時都有贏錢，幾過癮，覺得咁樣好似好過返工，所以慢慢開始唔想搵工，日日睇馬經，之後賭埋波。贏咗幾場後開始輸，但總覺得會贏返，同埋死都唔信我tip 嗰隻無理由唔中，點知買得愈大輸得愈多，賭到輸晒積蓄，但我真係唔可以唔賭，唔賭會好空虛失落，每日都無嘢做，於是開始問人借錢賭。

借錢賭輸晒，之前碌卡條數一直靠還 min pay去頂，頂到我真係無晒錢還，銀行差唔多日日打嚟叫還錢，我好大壓力，晚晚瞓唔到，覺得自己好廢，搵唔到錢仲要欠人錢，唔知可以點做，好無助，我點樣先可以搵多啲錢，點先可以唔去賭？唔知點算。

之後阿爸賣咗層樓幫我還債，但我欠人真係好多錢，層樓都唔夠填數，還咗啲但都仲係畀人日日追數，好㥬惶，一聽到電話聲就好驚，試過驚到掉咗個電話。我好少時間瞓得著，但我一瞓著就會發夢，夢到畀人追數。好驚會畀人斬死，於是諗與其一家人畀人斬死，不如自己嚟。除咗行呢條路，我真係諗唔到仲有邊條路可以行。

喺我想上天台做傻事前，有朋友嚟探我，佢知道我好困擾無助，於是介紹咗家庭服務中心畀我，佢話問吓社工可以點樣幫手。於是我搵返我住嗰區嘅家庭服務中心，認識咗社工陳姑娘，佢先了解我同屋企人狀況，幫我哋做情緒輔導，又會請「過來人」阿Chris嚟做朋輩輔導，切身處地體會我面對嘅問題，成為同路人。我開始覺得唔孤單，佢幫咗我好多，我啲情緒慢慢穩定落嚟，亦唔再倚賴賭同買嘢去填補心靈空虛。而債務上最後申請咗債務重組，日後再慢慢還債。

我重生後，陳姑娘同阿 Chris耐唔中都有聯絡我，擔心我再次沉輪。但自從呢次後，我已經生性，戒咗賭喇，仲開始做義工幫返行緊我條舊路嘅人。」

綜合家庭服務中心 助「成癮者」走出陰霾

‍

以上事件中的事主是「成癮者」，他沉溺於購物及賭博，險禍及家人性命和斷送自己前途，影響一生。幸得家庭服務中心的社工援助，令他和家人及時脫險，阻止了悲劇發生，同時挽回一家人性命。

目前綜合家庭服務中心有三個主要組成部分，包括家庭資源組、家庭援組和家庭輔導組，分佈全港的 65 間綜合家庭服務中心，均提供一系列預防和支援補救性的家庭服務，不論是個人或家庭有需要，也可尋求協助。

別以為向綜合家庭服務中心求助會感到尷尬，或不懂開口表達內心不安和需要。綜合家庭服務中心有大量專業社工，可以為求助人提供適切幫助，解決內心不安和情緒困擾問題，或可為求助者尋找社會上不同資源，協助求助者渡過難關，重回生活正軌。

求助者可以全日24小時致電綜合家庭服務中心，中心將有職員接聽求助個案，即使是深宵達旦或線路繁忙，熱線也會轉駁至東華三院青少年及家庭服務或相關部門，讓求助者不會感到救助無門。

此外，由於綜合家庭服務中心為社會福利署核下部門或指定合作機構，設有投訴機制和監管制度，所以只要求助者踏出求助一步，中心職員不會推搪，更歡迎有需要人士提出求助，讓他們可以拯救更多生命，協調更多家庭關係，共建和諧社會。

如發現身邊有朋友或家人需要援助，或你正有相關需要，請不要猶疑向綜合家庭服務中心求助或歡迎留言予我們查詢。

_相關資料

_{社會福利署綜合家庭服務中心}

 _{戒賭服務介紹}

_{圖片來源：}

_PhotoAC