日間長者中心服務   舒緩照顧者壓力

人口老化數字急增劇增，是每個發達城市面對的挑戰。醫療問題往往令樂齡人士及身邊的照顧者最為煩惱。阿娟（化名）需要照顧年逾八十兼體弱多病的母親，同時兼顧工作。在家庭和工作的壓力夾擊下，令阿娟險些走上不歸路。

阿娟，今年50歲，從事船務文員工作，單身兼且是家中獨女。父親早逝，一直以來也是與母親（化名陳婆婆）雙依為命。陳婆婆年時已高，體弱及行動不便，近年更出現腦退化跡象，所以陳婆婆每次到醫院覆診，阿娟也會請假陪伴，盡量照顧母親。

「我無兄弟姊妹，爸爸走咗後，我就肩負起照顧媽咪嘅責任。但呢個責任好似愈嚟愈沉重，因為媽咪嘅身體好似一日差過一日，由以前佢自己去覆診，到後期佢有少少腦退化，我唔放心佢一個人去醫院，所以我會陪佢去。自從佢有腦退化跡象後，性情大變，很小事都會鬧人，情緒起伏好大，我都『食』唔少佢嘅負面情緒，有時都好唔開心。

我日頭要返工，唔可以每日24小時睇住佢，但就係因為咁，佢前排喺街市買餸唔小心『跣』親導致中風，半邊身郁唔到，醫生話就算好返，都要好好照顧老人家，唔好畀佢再跌，仲要定時食藥，唔好畀佢身體再差落去。

我之前成日請假陪佢覆診，老闆已經唔係好鍾意，加上公司近年生意唔好，如果我仲成日請假陪媽咪，應該好快畀人炒，同埋我呢個年紀，萬一畀人炒咗會好難搵工。我唔可以無咗份工，屋企日常開支同屋租全由我負責，加上媽咪嘅醫療開支大咗，而自己又開始多咗病痛，我真係想像唔到無咗份工可以點算。

試過搵隔離鄰舍幫手睇住媽咪，但媽咪情緒好差，成日郁啲就鬧人，搞到人哋都唔敢再幫我睇。我身心都好辛苦同好攰，平日放工已經好攰，返到屋企照顧媽咪時成日都要扶抱，我要用盡全身氣力先可以扶到佢去廁所；心靈上都好攰，因為佢成日都會鬧人，但我已經好畀心機照顧佢，佢都好似好唔滿意咁。工作上就更差，除咗老闆有微言，同事就成日單單打打，話因為我請假令佢哋要做埋我啲嘢。

我真係好大壓力，曾經想過如果媽媽早一點走，對大家來說係咪一件好事？有段時間我真係日諗夜諗呢個問題，又唔夠瞓，喺屋企樓下唔小心跌親，樓下保安留意到我精神有唔妥，問我發生咩事，於是我就講咗我嘅狀況佢知，佢醒起之前喺屋邨活動認識林姑娘，專門做長者服務，於是就介紹咗林姑娘畀我。

第一次同林姑娘傾完計，個人舒服咗好多，佢好明白我嘅感受，亦都知道我同媽咪嘅難處。之後佢就建議我去屋企附近嘅綜合家庭服務中心，而中心就將我呢個個案轉介畀當區嘅綜合家居照顧服務隊，再由小隊嘅姑娘幫我哋。入面有綜合家居照顧服務，專門畀區內60歲或以上長者、殘疾人士，同埋有社會需要嘅人或者家庭提供以家居為本嘅社區支援服務。就好似我呢個case，佢哋知我最需要係長者日間照顧服務，於是就先建議我帶媽咪去屋企附近嘅長者中心先，由嗰個中心嘅社工做統一安老評估，之後就可以將我哋列入長期護理服務中嘅社區照顧服務排期。我哋好好彩，好快就排到我哋。我可以返工前帶媽咪去中心先，放工再接返佢，如果發生咩事，中心姑娘會即刻打畀我，我覺得呢個服務幫咗我好多，等我唔使擔心搵邊個照顧媽咪，又可以返工搵錢，維持生計。

中心嘅姑娘仲話，如果第時我媽咪有需要，可以申請『長者社區照顧服務券』。有政府資助，減輕經濟負擔。以「錢跟人走」嘅模式，畀合資格長者因應個人需要，使用社區照顧服務券選擇合適嘅社區照顧服務，支援居家安老。

真係好好彩遇到咁多位好心地嘅姑娘，解決咗好多生活上嘅問題，佢哋仲有啲情緒輔導畀我，等我精神唔使咁崩緊。宜家真係一身都輕晒，希望大家都身體健康，平平安安我就滿足喇。」

照顧者才是最需要被照顧  請即求助

‍

「家有一老，如有一寶」，但如果家中這塊瑰寶身體變差需要照顧，作為身邊人的照顧者，應如何面對和自處？以上個案阿娟，慶幸遇上林姑娘而認識綜合家居照顧服務，令原本陷入困局的狀況得以扭轉。如果你剛巧近來的生活狀況有如阿娟一樣，別要轉牛角尖，不用擔心，請即向綜合家庭服務中心求助，當中的長者家庭服務提供一系列的照顧及支援，協助有需要的長者盡可能繼續居家安老，保持最佳活動能力；同時為照顧者提供各類支援和協助。只要踏出求助一步，便可減少一場家庭悲劇。

求助者可以致電社署24小時熱線2343 2255熱線全日二十四小時運作的互動話音系統，讓來電者查詢福利服資料及索取資料傳真。社工在指定時間內（星期一至星期五：上午九時至下午五時，星期六︰上午九時至中午十二時）當值，為有需要人士提供即時輔導、支援和諮詢服務，並安排適切的跟進服務。即使是深宵達旦或線路繁忙，熱線也會轉駁至東華三院的家庭服務或相關部門，讓求助者不會感到救助無門。職員收到求助電話後，會立即轉介致相關社工，非常有效率協助求助者。

此外，由於綜合家庭服務中心為社會福利署核下部門或指定合作機構，設有投訴機制和監管制度，所以只要求助者踏出求助一步，中心職員不會推搪，更歡迎有需要人士提出求助，讓他們可以協助更多家庭。

如發現身邊有朋友需要援助，或你正有相關需要，請不要猶疑向綜合家庭服務中心求助或歡迎留言予我們查詢。

‍

 _{相關資料：}

_{社會福利署綜合家庭服務中心}

_{全港各區長者中心地址及聯絡方法}