重拾家庭溫暖  孩童綻放笑臉

香港生活指數高企，很多年青家庭的父母為養育子女，均要外出工作。父母工作時間長，親子及夫婦間的相處時間減少；加上生活環境擠迫，一家人容易產生磨擦，影響感情，深遠影響下一代。阿芳(化名) 正身處於這困局中，險釀成一宗兒童疏忽照顧慘案。

阿芳，33歲，與丈夫分開接近兩年，獨力撫養一名5歲兒子 (家熹)，居住於深水埗一劏房單位。「因為屋企地方淺窄，得80尺，以前成日因為呢樣嘢同老公嘈，生咗家熹後嘈得仲勁，於是佢就成日唔返屋企，慢慢發現原來佢出面有第二個女人，我決定離婚，之後佢無再理我同家熹。

我要交租又要養小朋友，呢個時期嘅小朋友要用好多錢，經濟壓力好大。我日頭返清潔工，有時夜晚返便利店做兼職，希望搵多啲錢。我返咗工嘅時間，就將家熹交畀家姐湊。但有家姐嘅鄰居同我講過，見過家熹一個人坐喺屋入面喊無人理佢，我有問過家姐咩事，佢話：「我都係落一落街啫，成日咁樣對住佢，佢唔悶我都厭啦。」雖然我知佢對我個囝唔好，但無辦法，我要搵食。

家熹由BB到宜家成日都喊，有時因小事會好激動發脾氣，但又講唔到發生咩事。佢直到3歲半先識叫「媽媽」，初時好驚唔知佢係咪有咩怪病，返學又畀同學仔笑，後來學校老師叫我帶家熹去做評估，先至發現原來佢係發展遲緩嘅小朋友，兼有抑鬱傾向。

我知佢有問題，但做情緒治療嘅醫藥費好貴，唔敢帶佢去睇。有時放工返到屋企好攰，返到屋企想唞吓，但家熹成日喊或者郁啲就發脾氣。試過有次佢突然好嬲，拎啲玩具周圍掉。我好忟，唔知點做，為咗令佢收聲唯有打佢，但打完佢我又好心痛，內心好矛盾同好辛苦，身心都好攰，有時會後悔生咗佢，自己唔識教，好似累咗佢咁。

直到有一日，我真係情緒爆煲，送家熹返到學校後，突然喺老師面前大聲嚎哭，於是同老師講我生活嘅難處同㥬惶，老師介紹咗屋企附近嘅家庭服務中心畀我，入面嘅社工王姑娘好好，逐步幫我拆解難題。例如幫我搵日間課餘託管服務中心，將家熹交畀中心姑娘照顧，中心有膳食安排又有小朋友同佢玩，佢開朗咗好多，託管時間又可以配合到我嘅返工時間，我好放心；王姑娘仲幫我搵有政府資助嘅機構服務，幫家熹改善發展遲緩問題。

王姑娘亦都幫我搵咗啲家庭生活教育同心理輔導，令我紓緩緊張壓力，同時學識點樣同小朋友相處。逐漸地我學識點樣教家熹，唔再打佢鬧佢，用適合同家熹溝通嘅方法教佢。宜家屋企雖然都係得80尺，但歡笑聲多咗好多，好彩有家庭服務中心同王姑娘幫忙，如果唔係去做傻事都唔出奇。好多謝家庭服務中心同王姑娘！」

家中重拾歡笑聲   有賴綜合家庭服務中心

‍

以上事主阿芳，失婚後獨力面對沉重的經濟及照顧小朋友壓力，一點也不容易。若經濟和照顧能力任何一方失衡，也會導致悲劇發生。幸得家庭服務中心的社工協助，令阿芳可以取得生活平衡，走出困局，令兩母子可以展現歡顏，投入新生活。

綜合家庭服務中心目前三個主要部份組成 —— 家庭資源組、家庭支援組和家庭輔導組，並分佈全港 65 間綜合家庭服務中心及兩間設於東涌的綜合服務中心，均提供一 系列預防、支援和補救性的家庭服務 。

人與人之間產生衝突很平常，更何況是一起生活的家人，所以如發現有家庭問題，別因為尷尬或「家醜不出外傳」的傳統觀念而不救助。你踏出的一小步，正援解一家人的感情和關係。家庭服務中心就家庭指導服務方面提供諮詢服務、家庭生活教育、親 子活動、輔導服務和轉介服務等。社工會提供家庭關係和子女照顧安排方面的意見和協助。 

求助者可以全日24小時致電綜合家庭服務中心，中心將有職員接聽求助個案，即使是深宵達旦或線路繁忙，熱線也會轉駁至東華三院的家庭服務或相關部門，讓求助者不會感到救助無門。

此外，由於綜合家庭服務中心為社會福利署核下部門或指定合作機構，設有投訴機制和監管制度，所以只要求助者踏出求助一步，中心職員不會推搪，更歡迎有需要人士提出求助，讓他們可以協調更多家庭關係，共建和諧社會。

如發現身邊有朋友需要援助，或你正有相關需要，請不要猶疑向綜合家庭服務中心求助或歡迎留言予我們查詢。

_{相關資料：}

_{倫常慘案可避免 綜合家庭服務中心家庭輔導服務幫到你}

_{政府課餘託管服務}

_{課後支援服務}

_{圖片來源：}

_freepik

_‍