【舜禹香港專欄】長者家居維修 助減少意外發生

家居維修對長者家庭來說,是一件切身又難以處理的事。當住所單位失修時,會增加家居意外危機,所以必須要適時妥善處理。但維修費用並非每一個長者家庭也負擔得起,所以不少長者的心態是「住得一日得一日」,但暗藏的家居風險卻與日俱增。阿明(化名)的父母,其住所出現不少問題,但維修費對他們來說是百上加斤。

 

老家收修,不敢帶孩子回去

 

「我係一個貨車司機,一家三口住公屋,全家得我一個搵錢,要養自己屋企同父母,每個月嘅收入都係啱啱好夠駛。每個星期我哋一家人都會返父母屋企食飯,等佢哋可以見吓個孫,但近排佢哋屋企有好多問題,我開始唔敢一家人返去。

 

老人沒有多餘積蓄,抗拒房子維修

 

我父母均年過七十,退休十幾年,住喺觀塘區單棟唐樓,我細細個都係住呢度,直到結婚先搬出去,所以佢哋呢個單位都有50年以上歷史。前幾年大廈大維修,佢哋迫住要夾錢,好唔容易拎咗一大半積蓄出嚟,所以宜家老豆一聽到『維修』呢兩個字,即刻耍手擰頭,好驚又要洗一筆錢。

 

在窗框鬆脫下晾曬衣服,危機處處

 

但事實上,佢哋屋企真係好需要裝修。上次上去食飯,發現飯廳個窗嘅窗鉸有輕微鬆脫,而窗外下面有晾衫架,我媽咪平日會喺度晾衫。當我發現窗鉸有輕微鬆脫,就即時幫佢哋扭返好啲螺絲,但其實窗花已開始有損壞跡象,已經勸阻媽咪唔可以再用晾衫架,好擔心佢會連人帶窗跌落街。

 

洗手間滲水,深夜上廁所易滑倒

 

另外,呢個單位只有一個廁所,同埋唔係乾濕分離,每次沖完涼都要抹地,以免去廁所時因地滑而跌倒。但近排廁所馬桶下面位置不時出現滲水,幸好滲出來是淡水,但就令個廁所地下長期濕滑。佢哋嘅解決方法係不時入廁所抹地,但呢個絕對唔係一個折衷嘅方法,加上佢哋深夜成日都要去廁所,好擔心佢哋瞓到睡眼惺忪,一不留神就會喺廁所跌倒,好危險。

 

 

老人及兒子沒法負擔維修費,子欲向朋友借貸

 

兩大家居危機真係殺到埋身,我只好又硬住頭皮勸兩老要做家居維修,老豆一聽到要維修即刻話:『上次大廈維修,我哋已經用咗一大半積蓄,銀行淨低嗰啲係我哋嘅棺材本。我都唔知喺邊度搵錢返嚟整,由佢啦,我哋自己小心啲應該無事嘅。』我好想幫佢哋,令佢哋可以住好啲,但我每個月嘅收入都係啱啱夠駛,又無積蓄,無錢幫佢哋。喺呢個時候,我唯有問朋友借錢解決。

朋友介紹『有需要人士維修自住物業津貼計劃』

 

朋友一聽到我話借錢幫父母屋企裝修,佢即時問:『你父母幾多歲?係咪自住物業』。初時諗係咪想叫我父母按咗層樓?原來佢係想介紹『有需要人士維修自住物業津貼計劃』畀我哋,最高可獲8萬蚊資助。

 

『有需要人士維修自住物業津貼計劃』申請資格

 

於是我就再細睇呢個計劃嘅申請條件同詳情。呢個計劃由市建局負責,為有需要自住業主提供財政資助,津貼維修自住樓宇嘅費用,改善樓宇失修嘅情況,加強居所安全。申請人須持有有效香港身份證、自住單位業主、年滿60歲,如有配偶亦均需同住此單位內,不過仲有一個重要條件,就係入息同資產限額。一對長者夫婦每月入息限額為 $15,810,資產限額為 $1,704,000,資產限額當然不包括有關自住物業嘅價值。

 

『有需要人士維修自住物業津貼計劃』資助範圍

 

我父母都符合申請資格,於是再細睇可以資助嘅範圍。以我哋嘅家居維修需要,計劃都可以包括:修葺破損嘅批盪或紙皮石;檢驗、修葺或更換破損嘅窗戶;更換食水喉等,似乎都啱我哋想維修嘅部分,於是我就去搵師傳(即承辦商)報價,因為交申請表時要將報價單,連同承辨商嘅商業登記一次過交。上星期我哋終於都交咗表,希望可以盡快批出,等我兩老都可以有個舒適嘅安樂窩。」

 

如申請有困難,歡迎聯絡我們

 

有不少長者的想法,跟阿明爸爸類似—— 缺乏資金為家居作維修,而身陷家居意外的危機中。幸好市建局推出「有需要人士維修自住物業津貼計劃」,為長者們提供資助,解決生活和經濟負擔。如果申請人之前曾申請房協轄下的長者維修自住物業津貼計劃,仍可向市建局申請這個計劃,惟兩津貼下,可獲的津貼總額不會超出上限 (即80,000港元)。而申請人在提交表格起計10年內,最多可分4次申請。

 

如果你或身邊的長者朋友有需要申請,但不太了解整個計劃詳情,或對申請手續、尋找承辦商等問題感到疑問和求助無門,可向鄰近的長者中心查詢,或歡迎在這裡留言與我們聯絡,我們樂意為長者家庭提供協助,讓長者可無憂擁有舒適的居所。

 

有需要人士維修自住物業津貼計劃👈點撃此處了解更多

 

相關資料:

有需要人士維修自住物業津貼計劃

長者地區中心

長者鄰舍中心

留下您寶貴的意見

歡迎留下對舜禹學堂想說的話。不論是對文章內容有任何疑問、想了解更多與自身相關的居家服務、或是想給予學堂支持與鼓勵,以及有熱忱想成為學堂中照耀民眾的小太陽,都請不吝嗇的留言告訴我們!我們會於工作日內儘快回覆您,謝謝!

Thank you! Your submission has been received!
Oops! Something went wrong while submitting the form.