A cozy home is very important to the silver-haired people because it is the place where they spend most of their time and where they can really live in peace after retirement, so living comfortably is the first requirement for a senior home. Like people, houses age and require timely maintenance. If the elderly own their own properties, they will have to pay a large sum of money for each repair, which is undoubtedly a heavy burden for them.

泉叔年逾70歲，與同齡太太同住於大角咀一幢單棟舊樓單位，育有一名兒子，兒子亦已成家立室，遷出單位。泉叔所住的單位40多年前買入，一直自住，大約在十年前兒子遷出後作過簡單裝修，便沒有修葺過。泉叔和太太所剩的積蓄不多，所以即使眼見客廳的牆身剝落，仍當作視而不見。

「喺呢度住咗40幾年，由阿囝BB嗰陣時住到宜家，可以話係祖屋嚟！呢度好好住，旺中帶靜，買餸又方便，所以就算樓價升咗幾多我都唔理，一直唔賣。不過呢度就真係舊咗啲，又無乜點裝修，一到回南天，天氣潮濕，成間屋就出晒水，但一乾返間屋啲牆身就開始『起樸』。試過天花牆身『起樸』剝落跌咗落嚟，嗰時咁啱食緊飯，成塊白色牆灰跌落碗湯度，好彩我哋見到咋，如果唔知飲埋都唔知點算。

我哋屋企係用一格格嘅膠地板，40年前整落，太太話貪佢夠平又易打理，平日都係太太負責抹地。但近幾年來佢手腳都有痛症，無力扭地拖，於是就成日好大攤水『撻』落地下抹，可能日子耐咗，啲水滲入膠地板入面無咗膠水黏力，慢慢出現掀起情況。有時甩咗都唔知，試過一行落地就跣親，成塊地板鏟起咗，好彩當時扶住張檯無跌落地。之後我哋用牛皮膠紙痴住甩出嚟嘅部分，好快就甩，唯有一甩又再痴，無辦法。

廁所沖廁水箱會成日漏水，試過漏到成地濕晒，太太半夜去廁所，黑媽媽唔為意就跌親。好彩唔係好傷，摔吓藥酒無事。宜家個水箱仲有滴水，所以有時半夜都唔係咁夠膽起身去廁所，但我前列腺唔係咁好，會有好多夜尿，又唔忍得好多，有時都幾辛苦。

可能因為呢度太舊喇，唔止我間屋，呢度啲電梯成日都壞。我住8樓，試過有次買完餸返嚟電梯壞咗，但又好心急想快啲返屋企煮飯，於是就一口氣行8層樓梯，行到我差啲斷氣，自從嗰次後，我唔會再行樓梯返屋企，不過部電梯一個月都起碼壞2-3次，每次整又整幾日，好唔方便。

人同屋都一樣，老咗自然就多病痛。我知道間屋有好多問題，要搵人嚟裝修，但我同太太已經退咗休好多年，積蓄唔多，如果用咗嚟裝修，我哋擔心連棺材本都無埋！又唔敢同阿囝講，驚佢要用錢，因為佢有頭家開支好大。有朋友建議過我哋不如賣咗層樓套現再租新屋住，我哋一來好怕搬屋；二來出面啲租好貴，每年都加租； 三來擔心住唔慣，所以間屋住得一日得一日。成日都會諗間屋點算而煩惱，可能諗得太多，返到去老人中心見到社工陳姑娘，佢哋就問我咩事，我就講畀佢哋知。

陳姑娘介紹我留意吓市建局推出嘅「有需要人士維修自住物業津貼計劃」，資助每一位符合資格嘅長者，最多獲港幣8萬蚊資助做維修，但個申請程序睇起嚟好似好複雜，又要審批又要輪候，好似仲要自己搵師傳。其實我都唔知道8萬蚊夠唔夠錢搞，又唔識搵師傳，所以最後我哋都唔敢申請。

好彩之後中心有個老友記，試過搵舜禹學堂幫手，話佢哋好似中介咁，可以幫到手，於是我就直接聯絡佢哋。嗰度有同事好留心聽我哋嘅問題，又會幫我哋搵唔同嘅裝修師傳，用好平嘅價錢，有啲甚至係義工幫我哋逐步解決裝修問題。不論係同事定裝修師傳都好有心。雖然最後都要用少少錢，但起碼係我哋可以負擔得到嘅範圍，而又唔怕畀人呃，宜家我哋個安樂窩仲差少少就完成喇！」

長者家居更須保養

根據資料調查顯示，每5名65歲的長者中，就有1人在過去一年曾經跌倒，大部分在家居發生。患有認知障礙症的長者，對於時間和空間的認知較為混亂，一不小心亦會釀成意外。因此，長者家居的安全度是非常重要。人需要保養，樓宇結構也需要定期維修，別要因少失大。長者家如果稍一不留神，往往很容易導致悲劇發生。

如有需要請即向我們求助

如果你或發現身邊朋友有需要幫助，不妨與我們聯絡。我們舜禹學堂愛維修服務計劃，自2017年推行至今，已經幫助不少個案解決難題。愛維修服務計劃，是幫助有經濟困難的長者，維修日久失修的家居用品，更有室內扶手加裝服務，希望幫助長者提升家居安全質素。

If you would like to know more about the program or have any questions, please feel free to leave a message to us at Sunyu Academy and we will try our best to answer them.

‍

_{Related information:}

_{有需要人士維修自住物業津貼計劃}