人口和城市老化是每一個繁榮都市面對的挑戰。城市老化同時帶出樓宇失修的問題，香港也不例外。在香港，樓齡達50年或以上的私人樓宇數目，在過去11年由3,900幢急增至8,600幢。大廈大維修需求劇增，住在舊樓或擁有單位業權的，大部分是長者，他們面對龐大的大廈維修費用，又如何承擔？

福伯為原業主，得悉大廈維修消息感徬徨

福伯年青時購入旺角一個私樓單位，與太太同住，沒有子女。他的太太三年前已仙遊，自此獨居。福伯今年已78歲，平日靠長者生活津貼及僅餘的積蓄生活，生活尚算應付得來。但近日收到業主立案法團通知，他所住的大廈需要進行大維修，維修費用由各業戶攤分。當福伯收到這個消息時，感到非常徬惶失措，差點釀成一宗交通意外。

福伯年少時購入房子，住到現在，但積蓄已花在妻子重病和之前的房屋裝修，沒多錢剩下

「我後生嗰時係中港貨車司機，八、九十年代嗰時係搵到啲錢，結咗婚又唔想捱貴租，於是同老婆的起心肝買咗宜家呢個單位，一住就住咗五十年。雖然咁多年嚟樓價有升，但我一啲都唔理，因為我對呢間屋同呢區都好有感情，無諗過搬。大概六年前，太太患上癌症同認知障礙症，為咗令佢可以住得舒服啲，我用咗一大半積蓄裝修間屋，自從呢次，我就無再搞過間屋喇，反正宜家得我一個人住，費事嘥錢啦，留返啲錢做棺材本好過。

福伯得知大廈維修需要 $42,000，心情晴天霹靂

正當我諗住喺度住過世嘅時候，突然有一日業主立案法團嘅主席同我講，大廈外牆要進行維修，可能係大廈樓齡高，開始出現老化、結構移動等問題，又或者係冷縮熱脹同滲水，令大廈外牆縫隙出現，為咗安全起見，必需進行維修工程。我都知道棟樓好殘舊，聽完主席咁講我都好驚，萬一住住吓變危樓點算，基本上我都同意做大維修嘅，不過主席話原來大維修要每一戶業主都要畀錢，佢話初步搵承商報過價，每一戶要畀$42,000！我一聽到後即時嚇咗一跳，$42,000對我嚟講，可以話係一個大數目。

大維修的金錢問題，令福伯差點被車輾過

雖然以前後生搵到錢，但之前一大半積蓄用嚟裝修間屋，又用嚟做咗老婆嘅醫藥費，真係所餘無幾，萬一我有咩事要睇病，我都未必夠錢醫，唔通要我賣咗間屋套現？賣咗我住邊？我一把年紀唔通要去借錢？我每日瞓醒對住四面牆就諗呢個問題，但又諗唔到解決方法，好辛苦。朝早我照常去晨運，連我啲晨運朋友都話我精神差咗，又無嚟神氣，試過同佢哋去晨運時掛住諗呢個問題，唔小心行咗出馬路，差啲出事，好彩當時佢哋可以即刻拉住我，如果唔係我可能已經去咗搵我太太。

朋友介紹「有需要人士維修自住物業津貼計劃」

喺萬念俱灰之下，我終於同晨運朋友講咗我困擾嘅問題，原來佢哋都遭遇過，桂姐就係其中一個過來人，佢係我哋晨運之友嘅核心成員，當佢知道我屋企棟大廈要維修時，即刻問我之前有冇申請過樓宇或房屋維修等資助，我話無，佢就同我介紹市建局嘅「有需要人士維修自住物業津貼計劃」，佢之前屋企棟樓都係要大維修，都為維修費煩惱，佢經朋友介紹就入紙申請，不過佢都有叮囑我，要睇清楚收入同資產限額，同埋問清楚工程內容，因為都驚申請完會唔批。於是我就睇返個資助計劃嘅相關資料。

福伯檢視申請資格及範圍

申請資格係持有有效香港身份證，年滿60歲，單身人士每月入息限額 $10,430，資產限額是$1,122,000。而每月入息限額不包括強積金供款、傷殘津貼、高齡津貼同有關自住物業嘅按揭供款；資產限額亦不包括有關自住物業嘅價值，我已合符基本條件。之後再睇吓資助內容，我見到資助範疇包括：樓宇結構改善工程，例如修葺鬆脫、破裂、剝落或破損嘅混凝土；改善樓宇外牆安全狀況嘅工程，例如修葺破損的批盪或紙皮石；樓宇檢驗或修葺工程等。淨係呢幾項都已經符合我嘅需要。

不過，桂姐都有提醒我，交申請表前，最好問業主立案法團主席拎返承辦商份報價單，一次過遞交，或者事先向市建局查詢，工程係咪涵蓋津貼範疇，咁就萬無一失喇。

好彩有桂姐提點，我照佢嘅意思去做，已經遞交咗申請，總算放下心頭大石。雖然維修費用要自己先預支出嚟，但起碼之後我可以拎返啲錢，唔駛擔心無咗份棺材本。」

申請須知

‍

「有需要人士維修自住物業津貼計劃」每個申請上限津貼是 $80,000，但以福伯為例，他的配偶已離世，津貼金額上限可能會有所調整或減至一半。因此遞交申請前，建議向市建局先查詢相關細節，例如津貼範圍、津貼金額、津貼金發放時期等，以免大失預算。或者可事先細閱申請須知：https://www.shunyuacademy.com/hk-knowledge/114 再作籌謀。

如果你或身邊的長者朋友有需要申請，但不太了解整個計劃詳情，或對申請手續、尋找承辦商等問題感到疑問和求助無門，可向鄰近的長者中心查詢，或歡迎你可在辦公時間星期一至五9:00-13:00及14:00-18:00致電34138790或WhatsApp：5548 5238直接與我們聯絡。我們樂意為長者提供協助，讓長者可無憂擁有舒適的居所。

有需要人士維修自住物業津貼計劃👈點撃此處了解更多

_{Related information:}

_{有需要人士維修自住物業津貼計劃}

_{Elderly Community Centers}

_{長者鄰舍中心}